Sabit

Hito
by Sancho D

maghapon nang nasa kalsada
isang libong jeep na ang nagdaan
basang-basa ang kalangitan
at mausok ang paligid

walang payong at babad
sa ulan na walang tigil
sipon at ubo sa una
pagtagal ay trangkaso na

wala nang lakas na makipagagawan pa
sa mga pasaherong animo'y
mga gutom na leon at tigre
rumaragasang patungo sa jeep

aanhin ko pa ang komportableng pagkakaupo
kung mga katabi ko nama'y
mga nangngangalit na ngipin
at matang matapang dulot ng basang pananamit

mga reklamong pabulong
mapanusok na tingin
sa tumatagaktak kong polo
at nagbabahang pantalon

higpitan ang kapit
at tibayan ang kalooban
sapagkat kay hirap ang sumasabit
kapag madulas ang hawakan