Wednesday, August 20, 2008

Deletion

Hindi lang tikbalang, aswang, multo, at mga lalaking itim ang nakakatakot at hindi maipaliwanag sa mundong ito.

May mga bagay na maaaring mawala sa isang iglap. Sa loob ng sampung segundo, maayos kang nakikisalamuha sa mga taong mahalaga sayo. Pagkurap mo, bigla na lang silang mawawala.

Mahirap magpaliwanag sa mga isipang nabibigla. Isang komplikadong bagay ang pagbibigay-rason sa mga emosyon na napupuno ng galit at pagkamuho sa isang tao.

Sadyang may mga bagay na pilit mo mang ingata'y mistulang parang alabok na pinahid ng hangin. Sa isang mabilis na pitik ng tadhana, lubusan itong lilisan.

Walang bakas. Walang alaala. Walang iniwang miski isang hibla ng buhok.

Higit pa sa kabutihang-loob, pagmamahal, pag-bibigay ng panahon ang kakayahan na kung tawagin ay pag-intindi.

Kabilang sa saknong ng pag-intindi ang lawak ng isipan na hindi nauunahan ng galit at pagkainis. Naririyan at kaunabay nito sa paglaganap ay ang pag-ibig na walang malisya at masamang pakay.

Sa pag-intindi mag-uugat ang isang payapang samahan na sasabayan din ng pagbibigayan.

Dahil ang bukas na isipan ay may malaking maitutulong sa pagtanggap ng mga bagay na hahadlang sa iyong tunay na kaligayahan.